Norvion ehf. og Austurríska fyrirtækið RK Infra hafa undirritað einkasölusamning sem felur í sér að Norvion tekur við sölu og markaðssetningu á lausnum RK Infra á Íslandi, í Færeyjum og á Grænlandi.

Megináhersla samstarfsins verður á einangruð sveigjanleg rörakerfi, þar á meðal FibreFlex og PEX-a fyrir hitaveitur.

FibreFlex lausnir RK Infra hafa verið til sölu á íslenskum markaði undanfarin ár og því er þegar komin reynsla af kerfunum við íslenskar aðstæður. Með nýja samstarfinu verður vöruúrvalið aukið og Norvion mun nú einnig bjóða hefðbundin einangruð PEX-a rör frá RK Infra.

Vöruframboð RK Infra nær þó lengra en til sveigjanlegra rörakerfa. Fyrirtækið býður einnig fjölbreyttar lausnir í einangrun á beinum rörum, fittings og öðrum íhlutum fyrir hitaveitur og ýmsan iðnað.

Samningurinn er mikilvægur áfangi í uppbyggingu Norvion og styrkir enn frekar vöruúrval fyrirtækisins fyrir hitaveitur, iðnað og aðra innviði. Jafnframt endurspeglar samningurinn það traust sem erlendir framleiðendur sýna þeirri reynslu og sérþekkingu sem teymi Norvion býr yfir.

„Við erum afar ánægð með að RK Infra hafi valið Norvion sem samstarfsaðila sinn. Fyrir okkur er þetta bæði spennandi tækifæri og mikil viðurkenning á þeirri reynslu og þekkingu sem við höfum byggt upp á þessum markaði. Það skiptir okkur miklu máli að öflugir erlendir framleiðendur sjái verðmæti í þeirri tæknilegu þekkingu og markaðsreynslu sem Norvion hefur upp á að bjóða,“ segir Brynjar Bergsteinsson, meðstofnandi Norvion.

Samstarfið við RK Infra fellur vel að stefnu Norvion um að sameina tæknilega ráðgjöf, sérþekkingu og öflugt vöruúrval og bjóða þannig lausnir sem taka mið af þörfum og aðstæðum hvers verkefnis.